DONOSTIAKO BILGUNE FEMINISTA

2010/09/22

Indarkeria sexistari kaña!

MATXISMOAK HILTZEN GAITU!

MATXISMOA KANPORA!

2010/09/14

Kontxako Banderaren afixari buruzko hausnarketa

??????????????????????????????

Aurten Kontxako Bandera iragartzeko Donostiako Udalak aukeratu duen argazkia ikusita, aise pentsa liteke estropadak baino, maratoia edo triatloi proba bat iragartzen dituela aipatutako afixak. Ikusi ez duenarentzat, deskribapena: itsura zoriontsuko gizon batek irabazi berri duen bandera astinduz ospatzen du lorpena.

Eta hor sortzen da hainbatek geure buruari egindako galdera: arrauna bezalako kirol batean oinarri-oinarrian dagoena ez al da ba talde lana? Arraunaz gehiegi ez dakienak ere jakin badaki arraunlari talderik gabeko patroia ez dela oso urrutira iritsiko itsasoan barrena...

Halere, bada hizpide dugun iragarkiak erakusten duen irudia eta ezkutatzen duenaren inguruko beste hausnarketa bat: orain bi urte, denbora luzez gauzatutako lanari esker, emakumez osatutako traineruek ere lehiatu zuten Kontxako Bandera. Aurten hirugarrenez lehiatuko dute, beraz. Donostian emakumeen estropada aurrera eramatea lorpen handia da, eta batek baino gehiagok pentsatu genuen bazela garaia! Baina aipatutako kartelari erreparatuta, badirudi emakumeen estropada bertan behera gelditu dela 2010. urtean, inondik inora ez baita ageri emakumerik, ez aipamenik, ezta ezer ere. Emakumeak guztiz ikusezinak gara.

Oso larria iruditzen zaigu Udalak afixa hau erabili izana, Udalak berak adostutako berdintasun planak bulegoren batean galduta daudela, baina lanerako tresna bezala erabiltzen ez dituztela islatzen baitu hain zuzen ere.

Jendarte hau eraldatu nahi badugu, gizon-emakume arteko harreman orekatuak sortu nahi baditugu, ardura guztiona da; bai instituzioena, bai eremu ezberdinetan lanean diharduten eragileena eta baita norbanakoena ere. Beraz, hitz hauen bitartez Donostiako Udala interpelatu nahi dugu, dagokion ardura bere gain har dezan eta parekidetasunaren alde egiazko pausuak eman ditzan, baina baita jendarteak oro har ere, begiak ireki ditzan, bereizkeria egoerak ikusi eta salatu ditzan, onartu ez ditzan.

Ekin diezaiogun talde lanari: parekidetasunaren estropadan denok gara arraunlari, eta denok dugu zer irabazia.

Donostiako Bilgune Feminista, 2010eko Iraila

2010/09/10

Tratu txarrak eta indarkeria bikote lesbianetan

Angela Marin soziologoak egindako lana:

“Maltrato y violencia al interior de relaciones de pareja lesbianas. El segundo closet”

Zuen interesekoa izango delakoan, Euskal Herriko lagun feminista, lesbiana eta interesa izan dezakeen orori helarazi!

Abuztuaren 31ko gertaerak gogoratuz

---

1813an Donostia erre eta emakume guztiak bortsatu erail ta abar egin zituztenean. Emakumeak gerrako botin gisa, saria bazala erabili eta hil zituzten garaia gogoratu nahi genuen, Donostiarron eta emakumeon memoria galdu ez dedin.

2010/07/26

DONOSTIAKO BE-BOP TABERNAN ERASO SEXISTA BORTITZA

DONOSTIAKO MATXISMOA SALATZEKO KOMUNIKATUA

Transmarikabollo Koordinadora Feministako kideok espazio publikoetako biolentzia sexista salatzen dugu, baita jendarteak zein instituzioek egunean-egunean Donostiako aisialdi guneetan gertatzen diren erasoekiko erakusten duen tolerantzia altua ere.

Donostian gertatutako azken eraso matxista salatzen dugu, 2010eko uztailaren 22an gaueko 1:30 inguruan gertatutakoa:

Lagun talde gazte bat (lau neska eta mutil bat) pote batzuk hartzera atera zen eta Be-Bopen amaitzea erabaki zuen. Dantzatzen ari zirela, tipo bat neska horietako batengana hurbildu eta lepotik heldu zion (hori da askok eta askok ligatzeko duten era, parean dutenaren onespena kontutan hartu gabe). Bi lagunen artean paretik kendu zuten arren, tipoak, berriz ere, nesketako beste bati lepotik heldu zion, baina oraingoan indar handiagoz. Lagunetako bat tipoa banantzen eta aldentzen saiatzean, hark indar handiagoz heldu zuen neska. Une hartan, lepotik helduta zegoen neskak, erasotzailearengandik banantzeko asmoz, edalontzian zuen garagardoa aurpegira bota zion. Ordainetan, bi aldiz pentsatu gabe, erasotzaileak edalontzia neskaren kopetan lehertu zuen, neska guztiz askatzera iritsi gabe. Aurpegi osoan zehar ebakiak sorrarazi zizkion, odol jario ikaragarria eraginez.

Orduan, tabernari bat erasotzailea kanporatzera etorri zen, inongo momentuan hura erretenitu eta bere identifikazioari bide emateko intentziorik azaldu gabe. Lagunek, berehala, erasoa jasandakoari babesa ematera jo zuten eta tabernaren parean zegoen banku batera eraman zuten. Tabernako langile bat bera ere ez zen bankura hurbildu neskaren segurtasunaz arduratzeko. Bankuan bertan, DYAk lehenbizi eta Gurutze Gorriak ondoren, laguntza eman zioten neskari. Azkenik, Gurutze Gorriak neska ospitalera eraman zuen.

Polizia Munizipala eta Ertzaintza azaldu ziren eta ardura noren esku geratuko zen zozketatzen bezala aritu ziren. Azkenik Udaltzaingoaren esku utzi zuten. Horiek, erasoa jasandako neskaren identifikazioa eta erasotzailearen deskripzioa besterik ez zuten eskatu. DYAk eskainitako informazioaren aurrean (eskua odoleztaturik zuen mutil bat Zurriolarantz korrika ikusi zutenaren inguruan), udaltzainek neskari bere adina galdetu zioten. Polizia agertu arte tabernako langilerik ez zen establezimendutik atera.

Eraso hori, Be-Bopen eta beste taberna askotan sarri gertatzen diren adibideetako bat besterik ez da. Emakumeoi etengabe intimidatzen, baboseatzen eta gutxiesten zaigu aisialdi guneetan. Batzuek uste dute ez garela euren nagusikeriatik zein kolpeetatik defendatuko, eta euren erasoak erantzunik gabe geratuko direla, izan ere, erasotzaileek Donostiako taberna askoren babesa izaten baitute.

Hori guztia dela eta, ozenki, publikoki eta kalean salatzen dugu, zigorgabetasun osoz etxe barruan zein kanpoan egiten diren erasoak arbuiatzen ditugula, baita horiekiko jendarteak duen konplizitatea ere. Halaber, instituzio publikoek biolentzia sexistarekin amaitzeko duten arduragabekeria ere salatzen dugu.

Erasorik ez erantzunik gabe!!!

GORA BORROKA FEMINISTA!!!

---

2010/06/23

Ekainak 28 - Sexu askatasuna, guztion eskubidea!!

Nahi bezela harremantzea zure eskubidea delako, eta oraindik horregatik baztertua izatea onartezina delako,

anima zaitez ekainak 28ko manifestaziora!

KOMUNIKATUA

Ekainaren 28 honetan, pertsona orok gure sexualitatea modu askean eraiki eta bizitzeko aukera aldarrikatzeaz gain, erabat baztertuta dauden aukera sexual ezberdinak aldarrikatu nahi ditugu. Argi dago bizi garen jendartean aukera sexualak bereizkeriak sortzen dituela, heteronormatik ateratzen diren aukerak epai moral eta sozialez beteta daudela. Eta bereziki larria da transexualen egoera, izan ere, transexualitatea gaixotasuna balitz tratatzen da; psikiatrizatutako aukera da. Jendarteko esparru guztietan diskriminatutako aukera sexualak izaten jarraitzen dute eta ezinbestean hauek sortzen dituzten bereizkeri egoerekin amaitu behar dugu.

Era berean, aurtengo ekainaren 28an gogora ekarri nahi ditugu baita ere, heteronormatibitatearekin hausteagatik eta euren sexua eta generoa libreki eraikitzeagatik gorroto krimenen biktimak izan diren pertsonak.

Integrismo katolikoa, edota beste edozein erlijio, eta medikuntza sistema dira gorroto krimenen arduradunak, izan ere, askatasun sexualaren aurkako apologia egiten baitute, fundamentalismo sexistak eta binaristak baitituzte oinarritzat eta geure gorputzak patologizatzeko edota geure bizitzak epaitzeko autoritatea beregan hartzen baitute.

Halaber, Estatua eta bere instituzioak ere krimen horien arduraduntzat jotzen ditugu, ez soilik diskriminazio ekintza argiengatik, baita euren utzikeriagatik eta arduragabekeriagatik, ez baitute transmarikabollofobia aurreikusteko, zigortzeko eta desagerrarazteko neurririk hartzen.

Mugimendu honen borrokari esker hainbat askatasun eta eskubide lortu ditugu, baina horietako asko formalitate eta “zuzentasun” politikora murriztu dituzte. Gure borroka instituzionalizatzeari uko egiten diogu, jendartearen mobilizazio eza baitakar. Mundu mailako zibilizazio krisi garai honetan, familia goresten duten indar kontserbadore heteronormatiboek gogor egiten dute geure askatasunak murrizteko eta gorroto krimenak sustatzeko. Borrokan jarraitu behar dugu!!

Sistema heteropatriarkalean edota merkatu kapitalistaren logikan integratzeko politika baztertzen dugu. Moral bikoitzeko jendarte binarista, sexofobo eta matxista baten partaide eta konplize izateari uko egiten diogu. Muinean heterosexuala, zuria, katolikoa, apostolikoa, erromatarra, kontsumista eta ingurugiroaren zein baliabideen suntsitzailea den familiaren interesen arabera egituratzen den jendarte baten partaide eta konplize izateari uko egiten diogu.

Borroka feminista, antiklasista, antiarrazista, antikapitalista, antiinperialista, antipatriarkala da gure apustua.

Hauxe aldarrikatzen dugu:

Borroka apurtzailea, intsumisoa eta disidentea izan behar da, zuzentasunaren agindu arautzaileak hausten dituena. Ez dugu normalak izan nahi. Nahi duguna izan nahi dugu!
Borroka muga-gaindikoa izan behar da, beste herrietako taldeekin elkarlanean egingo dena, etorkinekin, amonekin, gazteekin, etxekoandreekin, etxeko langileekin, baserritarrekin, ikasleekin, autonomekin, putekin, espetxean daudenekin... hau da, hainbat sistema zapaltzailek baztertzen dituzten taldeekin.
Borroka ohean eta kalean egin behar da, gorputzak eta desioak matxinatuz, eta hipokrisia zein moral zikiratzaile nagusiari aurre eginez.
Borroka eraldatzailea izan behar da, sexuak eta generoak deseraikitzera bideratua, norberak bere gorputzaren eta sexualitatearen gainean askatasunez erabaki dezan. Gorputz disidenteen despatologizatzearen aldeko apustua egiten dugu.

Ezinbestekoa da gaur egungo jendartea arautzen duen heteronormarekin amaitzea eta patriarkatuak sortu dituen kategoria hertsi eta mugatuak erabat baztertzea. Aniztasunean oinarrituko den jendarte feminista baten alde lanean jarraituko dugu! Amorruz, pozez, lasai, gozatuz, baina batez ere, desioz eta ziurtasunez egingo dugu borroka.

Bollerak! Transexualak! Marikak! Heterodisidenteak! Eta gainontzeko espezieak!

Gora sexu askapenerako mugimendua!

TRANSMARIKABOLLO KOORDINADORA FEMINISTA

2010